Երրորդ դասարանի վերջում՝ մայիս-հունիս ամիսներին, կրթահամալիրի կրտսեր դպրոցում կազմակերպվում է «Իմացումի հրճվանք» ծրագիրն ավարտող սովորողի ուսումնական կարողությունների ու հմտությունների ներկայացման ստուգատես։
«Ելք» ստուգատեսի բովանդակությունն ուղղված է ինչպես 1-3-րդ դասարանների ուսումնական պլանով որոշված բաղադրիչ դասընթացների արդյունքների, այնպես էլ սովորողի ընտրությամբ գործունեության բաղադրիչի ամփոփմանը։
Ստուգատեսի նպատակներն են սովորողի անհատական և խմբային նախագծերի իրականացումը, երրորդ դասարանում ձեռք բերած կարողությունների ու հմտությունների ներկայացումը։
Ուսումնական օրացույցով որոշված մայիսյան ամենամյա հավաքի և հունիսյան երկշաբաթյա ուսումնական ճամբարներում կազմակերպվող ամենամյա ստուգատեսին սովորողը ցուցադրում է ուսումնական տարվա ընթացքում իր ձեռքբերումները, ձևավորված-զարգացած կարողությունները, հմտությունները։
«Ելք» ստուգատեսի ընթացքում սովորողը բլոգում բացում է համապատասխան անվանումով բաժին, որտեղ հավաքում և ամփոփում է ձեռք բերած հմտություններն ու կարողությունները։
«Ելք» ստուգատեսի բովանդակային ուղղություններ՝
- ընթերցելու կարողությունների ներկայացում,
- մաթեմատիկական, տրամաբանական կարողությունների ներկայացում,
- մեդիահմտությունների, այդ թվում՝ բլոգավարության հմտությունների ներկայացում,
- միմյանց բլոգները դիտարկելու, գնահատելու, ունակությունների ներկայացում. ինքնագնահատում,
- հարթակում սովորողն է,
- երաժշտական ունակությունների ներկայացում,
- մարզական կարողությունների ներկայացում
- տեխնոլոգիական հմտությունների ներկայացում,
- բնագիտական, հայրենագիտական գիտելիքների ներկայացում,
- օտար լեզուներով շփվելու կարողությունների ներկայացում,
- ընտրությամբ գործունեության արդյունքների ներկայացում,
- լրացուցիչ կրթության արդյունքների ներկայացում,
- այլ։
«Ելք» ստուգատեսի անհատական և խմբային ներկայացման ձևեր՝
- պատում
- նկարաշար
- ձայնագրություն
- տեսանյութ
- համերգ
- ցուցահանդես
- ներկայացում
- ճամփորդություն
- մեդիափաթեթ
- անթոլոգիա
- այլ
Խմբային ներկայացման համար դասվարը նախապես
կազմում է ստուգատեսային օրացույց՝ ըստ դասարանների ներկայացման օրերի։ Որպես ամփոփիչ նախագիծ՝ հրավերն ուղարկվում է ծնողական համայնքին, տարածվում
սոցցանցերով, այլ մեդիա հարթակներով։
«Իմացումի հրճվանք» ծրագրի 3-րդ դասարանն ավարտող սովորողի ուսումնական առաջադիմությունը գնահատվում է նրա գործունեության բոլոր ձևերի ներկայացմամբ՝ «Ելք» ստուգատեսով, որի արդյունքներն ամփոփվում են սովորողի զարգացման բնութագրում՝ իբրև որակական գնահատական։
Հաշվի են առնվում սովորողի անհատապես և խմբով կատարած աշխատանքները, այդ թվում` սովորողի մասնակցությամբ ստեղծված և մեդիահարթակում (անհատական էջ/ բլոգ, դասարանական բլոգ) տեղադրված նյութերը գործունեության յուրաքանչյուր բնագավառից։
Հեռավար ուսոցմամբ սովորողը «Ելք» ստուգատեսին մասնակցում է իր բլոգում եղած ուսումնական նյութերի, ուսումնական պարապմունքների, այդ թվում՝ նախագծերի, ուսումնական ճամփորդությունների, ճամբարների, լրացուցիչ կրթության մասնակցության արդյունքների հիման վրա հեռավար։
3-րդ դասարանցին 4-րդ դասարան տեղափոխվում է իր ուսումնական բլոգում եղած ուսումնական նյութերի, ուսումնական պարապմունքների տարբեր ձևերի, այդ թվում՝ նախագծերի, ուսումնական ճամփորդությունների, ընտրությամբ գործունեության, լրացուցիչ կրթության, մասնակցության արդյունքների հիման վրա։